Каникулярлық мектеп: арманға алғашқы қадам

Қызылорда қаласындағы NIS-те жалпы білім беретін мектептердің 6-сынып білім алушыларына арналған Каникулярлық мектеп өз жұмысын бастады. Бұл бірегей білім беру жобасына Виртуалды мектептің онлайн оқуынан сәтті өтіп, қорытынды тестілеуден жоғары ұпай жинаған үздік оқушылар қатысуда.

Каникулярлық мектептің бағдарламасы қатысушылардың тілдік және жаратылыстану-математикалық пәндер бойынша академиялық білімін нығайтуға бағытталған. Сондай-ақ болашақ NIS оқушылары үшін маңызды кезең саналатын – Зияткерлік мектептердің конкурстық іріктеуіне дайындалуға мүмкіндік береді.

Айта кетейік, биыл Зияткерлік мектептердің 7-сыныптарында оқу үшін конкурстық іріктеуге құжаттарды қабылдау 8 қаңтардан 11 ақпанға дейін жүргізіледі. Осы кезеңде үміткерлер қабылдау комиссиясына тиісті құжаттарын тапсыруы қажет. Кешенді тестілеу 2025 жылдың 27 және 28 наурызында өтеді. Толық ақпарат мектептің ресми сайтында «Оқуға түсу» бөлімінде көрсетілген.