“ENVIRONMENTAL ISSUES” ағылшын лигасының желілік пікірсайыс турнирі

«Назарбаев Зияткерлік мектептері» ДББҰ филиалдары оқушылары Алматы қаласындағы химия-биология бағытындағы Назарбаев Зияткерлік мектебіне жиналып, ағылшын лигасы бойынша пікірсайыс өткізді. Желілік турнирге еліміздің әр өңірінен келген барлығы 110 оқушы қатысты. Айта кетейік, пікірсайыстан ағылшын лигасы алғаш рет ұйымдастырылып отыр.

Екі күнге созылған шарада NIS оқушылары дебат өнерін жоғары меңгергенін көрсетті. Сонымен қатар қатысушылар өздерінің пайым-парасатын, білім мен біліктілігін және шешендік өнер мен батылдық танытты. Ең бастысы шәкірттер дебаттың – ұрыс алаңы емес, нақты тақырып аясында арнайы ережелер негізінде ой жарыстыру екенін жақсы түсінген.

«Дебат жаңа мүмкіндіктерге жол ашады, ортаңыз өзгереді, достарыңыз көбейеді», - деген қатысушылардың әрқайсысы тыңғылықты дайындықпен келгендерін аңғартты. Ағалышын тілінде өткен пікірсайыста қатысушылардың қарымын еліміздегі беделді дебат клубтарының төрешілері бағалады. Дебаттың тақырыбы экологиялық мәселелерге арналды.

Дүбірлі дода қорытындысы бойынша Ақтөбе қаласындағы физика-математикалық бағытындағы Назарбаев Зияткерлік мектебінің дебатшылары III орынға табан тіреді.

Астана қаласындағы Халықаралық бакалавриат мектебінің оқушылары II орынға ие болды.

Ал I орын Алматы қаласындағы физика-математика бағытындағы Назарбаев Зияткерлік мектебінің шәкірттеріне берілді. Ағылшын тілінде өткен алғашқы дебат алда өз жалғасын таппақ.